Mì n’hoo mai vist come mì, cara gent
foeura de matt per ona bella tosa
ma gh’hoo de dì che hoo perduu i sentiment
a vardagh tròpp i tett in la camisa

Rit.:
L'era on bell fior in d'ona pell de vacca
l'era ona vacca e la pareva on fior
ona sanguetta che quand la se tacca
la te strepenna e la te strascia el coeur


El ciel el gh’aveva daa tanti ròbb
de brusà i man appenna vun i e tocca
ghe n’era inscì che mì savevi nò
savevi pù indove andà a poggià la bocca

L'era on bell fior ......

On coo de ratt senza sentiment
senza cervell e nanca spiritosa
ma per podè fà l'amor basta nient
gh'è nò bisògn de fà studià ona tosa

L'era on bell fior ......

On dì l'è andada e la m’ha pientaa chì
el coeur consciaa de fà quasi vergògna
tucc i decòtt che m'è toccaa sorbì
hinn nò staa bon de famm passà sta rògna

L'era on bell fior ......


Gh'hoo tiraa adree tanti maledizon
ma adess ormai l'hoo bell e perdonada
anca se la m'ha lassaa sto pover coeur
consciaa e sbattuu come ona ressumada

L'era on bell fior ......