Bilita bunita

Di tras di kutelu

Pombinha formoza

Di korpu prensadu

kriola murena

Di koxa rodondu

Mulata xôbega

Di odju maguadu

Sê mãe ku mininus

Ka teni amparu

Sê pai ta trabadja

Na país strangeru

Ku salariu magru

Tudo kuza e karu

Na tera di guentis

Tudu e ku dinheru

Dentu un sol kenti

Ku kalmaria

Belita bai kabu

pastora limaria

Ku kabra maradu

La na strabaria

Dentu di k-el tchon

k'ê di parseria

Ka ten tabakera

Dentu di kural

Ki fari manguera

Dentu di kintal

Ka ten karapati

Ka ten karisal

Ka ten mandiokera

La na padjigal

Bilita ba caza

Pa rotcha rubera

E salta paredi

E dixi ladera

E subi kutelu

Kuspidu purguera

E funda na tchada

Tipu batatera

Minina bunita

kandu el ba deta

El tchorá sê vida

El tchorá sê lida

Di p-al manha sedu

Kond el levanta

El kontinua vida

Ku tudu se lida

Sinku anu dipos

Bilita kanta

Se pai ben di longi

Se mãe otcha saude

Djuntu ku Bilita

Tudo mundo grita

Viva independência

Viva liberdade