t Is aacht uur in mörgen en k wor wakker
Van n traain dij stoom oetbloast
Gerdienen sloag ik open en k zai t vee
Dat boeten in t gruinlaand groast
n Brandvos lopt doar mit heur vool
n Poar schoapen en n jonge bok
En in de wiedte, zai ik nog net
t Stoom van d'olle loc

Dij beelden blieven mie op t netvlies stoan
Zai geven mie evenpies lucht
Hail aans as dat jachten en joagen
k Bin even dizze tied ontvlucht

Bakkerknecht mit körf op fiets
Gaait hoezen laangs mit stoet
Twij oldjes koiern haand in haand
Zai binnen der evenpies oet
In schoul heur k kinder: aap, noot, mies
Köster van kerk knipt heeg
Zielwoarder wacht op t eerste schip
Mor t wotter staait nog te leeg

Boer dij gaait mit lutje knecht
Mit peerd en woagen noar t laand
Kinder binnen aan t speulen op t pad
Ze moaken n kestail van zaand
Twij vraauwlu dij gunnen zok gain tied
Ze hebben t mit proaten te drok
En in de wiedte, zai k nog net
t Stoom van d'olle loc